初十五月圓 5月31日 星期四 

十分漫長而且多多事幹嘅五月,終於都嚟到last day喇,回想2007嘅五月係我人生其中一個嘅轉捩點,之前嘅幾個月裡頭發生太多事喇,一時之間要承受好多又好大嘅壓力,當時真係令我抖唔到氣,想搵個傾訴嘅對象都冇,慢慢咁將自己孤立起嚟,最後搞到家庭四分五裂,一家人嘅關係開始破裂,想盡辦法去修補已經太遲了......由於一早就已經失去對工作嘅熱誠,現在更加無心戀戰,最終也是逃唔過辭職嘅命運......

我花了整整一個月嘅時間放鬆自己,運用每一晚放工嘅一段時間去想想,去反思,去尋找,去重組,去修復,去彌補,到頭來發現必需改變一下自己,要勇敢去面對自己嘅錯失,要努力去管理良好嘅人際關係......今日係其中一位被公司炒魷嘅同事嘅last day,他已經找到新工作,人生總係充滿希望嘅~

後記: 很多秘密就像吃東西一樣，只有自己嘗試才能體會。光跟別人說那食物有多好吃，是沒有意義的。

南風 5月30日 星期三 

老闆開始關心我幾號係last day,突然之間走嚟問我,我諗都唔使諗就答佢六月十五,之後老闆再問我美國工程做完哂未,呢個問題令我呆一呆......我只可以回答做完了,更令我不解嘅就係老闆竟然比嘢我搞,真係唔多明白佢個心諗緊咩,係咪搞笑先,明知我就快離職仲要我搞新嘢,之後d蘇州屎邊個去抺呀? 更離譜嘅竟然一次過比兩單嘢我跟,天呀......唔好搞事啦好冇,我只係想平平靜靜咁坐埋呢半個月而已~

後記: 人生是不斷選擇，不同選擇會帶來不同程度的困境：順從老闆，還是堅守己見？帶著面具，還是以真性情待人？怎樣選擇，是每個人都要面對的矛盾。

及時雨 5月29日 星期二 

左望望,右望望,但我並唔係要過馬路,但過馬路時當然要望左望右啦,安全至上呀,我係睇清楚有冇人走過嚟我身邊,好彩今日兩個麻煩老闆又外出,公司突然又變得好輕鬆,之但係我仲未可以放鬆,打醒十二分精神先,然後打開Word打履歷表,响公司嘅辦公時間打履歷表並唔係第一次,不過呢間公司同舊公司有d分別,就係唔可以太過揚,靜靜雞也還好吧~

後記: 童年一般是最幸福的，但進入社會以後，身上自然的東西便失去得越來越多；就像本來用腳走路就可以，卻非開車不可。

熱降雨 5月28日 星期一 

除了我辭職之外,下個月還有另外兩位同事都要走,我比他們來得幸運,我係自己遞上辭職信,即係我炒老闆魷魚,而他們就剛剛與我相反,比老闆炒佢地魷魚,比較好彩嘅就係老闆仲有些許良心,已經比足一個月時間他們搵新工......

今日返到公司氣氛有d沉重,其中要離開嘅人心情當然唔多好啦,而知道就快有同事要離開,而且仲要係被"炒魷",大家心裡總覺得公司有點不近人情,每個人嘅心情都不太好! 我反而覺得好自在好輕鬆,公司自有一套管理制度,在商言商當然沒有情面可言,幫唔到公司搵錢嘅自然冇得留低~

後記: 自然、真實、不扭曲、簡簡單單，就是最好的生存價值。其實人和鳥沒有分別，只是人加了太多框框在自己身上。

太陽沈沒 5月27日 星期日

星期六可惜要返工,朝頭早明明係陽光普照,我心中嘅一團火已經滾燙起嚟,返工之前再仔細咁check清楚帶齊游水裝備未,帶齊了......公司所有同事嘅心情就同我一樣,等待著一點鐘嘅來臨,這樣半天又過去喇!

先搭巴士返屯門同三哥一齊食餐午飯,之後就向屯門游泳池出發,可惜太陽被雲層阻擋住完全走不出來,總覺得缺少了太陽......好可惜,不過最後得到三哥嘅指點,我終於都學識游水喇,現在我可以一口氣游十米左右(很少呀),打後嘅日子我會更加努力去游,掌握呼吸係我最需要多加練習嘅事項,好好地等待天氣好嘅假期吧~

後記: 錢是重要的，但足夠基本生活所需便可以了，生活的樂趣不在您有多少錢實踐多大的計畫，而是您有多少資源做多少工作。

酷熱 5月25日 星期五

天氣依然都係咁好,如冇意外週末應該都會陽光燦爛,終於都可以進行下水禮喇,不過最可惜嘅就係......我唔識游水......幾年前學過,但一直都學唔識,因為自己比較怕水,個人沉沉下冇哂安全感,當年教練話我唔識游水係因為心理問題,之後我就更加怕,所以好耐都冇去過游水,之但係我下定決心要改變自己,我必須勇敢去面對自己,不,係面對游泳池,聽日三哥都會同我一齊去,係三哥鼓勵我嘗試,我的的確確行出了第一步,現在係時候再鼓起勇氣踏出第二步喇~

後記: 我不覺得自己活得很苦，如果是自己真正喜歡的生活，了解自己在做什麼，肉體和精神上都沒什麼痛苦。

大熱天時 5月24日 星期四

昨晚約哂一班舊同事食飯,賀Connie姐脫離高昇工程有限公司呢個地獄,兩打啤酒絕對係走唔甩嘅......

不經不覺五月尾又來臨,今日係佛誕假期,感覺有點與我何干,我本身沒有任何宗教信仰,根本上與佛教談不攏,但香港係個被世界推崇為國際大都會,不論中外也好都全單接收,我能夠生於香港點都係恩賜,什麼的誕也是公眾假期,為何我的誕會沒有呢? (我每年都會請假為自己慶祝)

眼見今日天氣好到不得了,所以約齊屯門之友去游泳池游水,我還買了一條新嘅泳褲準備下水禮,可惜事前功夫準備得唔足夠,原本逢禮拜四屯門游泳池都會大清潔,大家只好您眼望我眼,失望而回~

後記:

古詩欣賞--宋代黃庭堅《清明》

「佳節清明桃李笑，野田荒塚只生愁。

   雷驚天地龍蛇螫，雨足郊原草木柔。

   人乞祭餘驕妾婦，士甘焚心不公侯。

   賢愚千載知誰是，滿眼蓬萵共一丘。」

大雨 5月22日 星期二

好多老人家經常忘記大事小事,舊一輩只會話人老冇記性,而現代稱之為老人痴呆症,我發覺自己開始記憶衰退,問題並未去到想像中咁壞,不過都要正視呢個問題,隨住時間一分一秒地過去,我忘記嘅事就愈來愈多,舉例: 十年前中三同學仔/女嘅姓名,差不多近六乘已經完全忘記,而中一嘅已經百分百忘記,就快連學校嘅老師們都會記不起......到底我個腦係用嚟莊咩嘅呢~

後記: 「去年今日此門中，人面桃花相映紅。人面不知何處去，桃花依舊笑春風。」

小滿 5月21日 星期一

除了兩位老闆已經知道我唔撈之後,現在會計小姐也知道喇,豈不是連全公司都知道,我並唔想咁快就通告全天下,我先讓家人圈及老朋友圈知道,等他們比多點意見過我,意見只係比我冷靜去分析,而最終決策人依然係我!

不過今次辭職事件比較特殊,問題並唔係一朝一夕就出現,我經過長達六個半月嘅再三考慮彼才拍板,而導火線係班同事將我偷懶嘅片段拍低,仲要放上公司嘅server任人欣賞,雖然始終係我做錯事,但係同事(朋友)之間嘅關係,係咪真係如此脆弱呢~

後記: 母親煮的菜，是天下美味，可不是嗎？外食哪有「家常飯」好吃，那是「愛的味道」。

連連雨 5月20日 星期日

有人話"在家千日好",通常人人都有同感,我也有,打個比喻,如果一個人安居於屋企整整一千日,其間不能踏出家門半步,這個人會唔會再覺得家是好呢? 早一排失業率曾經高企,失業嘅人兄到底點去過日子,大部份人應該會以屋企為長駐基地,要搵到新工未必可以三幾日就搵得到,如果運氣不佳的話,也許需要停留家中千日或以上,我還未開始搵新工作,因為我對自己有信心,坐月最後一個禮拜我才會出擊,到時我將以最佳狀態示人,讓我準備嘅時間很充足~

後記: 何不樹之於無何有之鄉，廣漠之野，彷徨乎無為其側，逍遙乎寢臥其中。